سانحہ بلوچستان پوری انسانیت کے ضمیر پر حملہ ہے، مریم نواز

وزیر اعلیٰ پنجاب مریم نواز شریف نے بلوچستان میں غیرت کے نام پر ایک بیٹی کے بہیمانہ قتل کی شدید مذمت کی ہے۔

انہوں نے اپنے 'ایکس' پیغام میں کہا کہ اس دلخراش واقعے نے ہر حساس دل کو جھنجھوڑ کر رکھ دیا ہے۔

مریم نواز شریف نے اس واقعے کو "پوری انسانیت کے ضمیر پر حملہ" قرار دیتے ہوئے اس بات پر زور دیا کہ یہ ظلم ناقابلِ معافی ہے۔

انہوں نے دو ٹوک الفاظ میں کہا کہ ریاستی قانون سے بالاتر کوئی بھی رسم، روایت یا سوچ قطعی طور پر قابل قبول نہیں ہے۔

وزیر اعلیٰ نے اس بات پر زور دیا کہ قاتلوں کو جلد از جلد قانون کے کٹہرے میں لایا جائے اور انہیں انصاف کے تقاضوں کے مطابق سخت ترین سزا دی جائے۔