سانحہ ڈیگاری، بیٹی کے قتل کو جائز قرار دینے والی ماں سے متعلق عدالت کا بڑا فیصلہ

کوئٹہ کی انسداد دہشت گردی عدالت میں ڈیگاری کے علاقے میں پیش آنے والے غیرت کے نام پر دوہرے قتل کے ہولناک کیس کی سماعت ہوئی، جس میں اہم پیش رفت سامنے آئی ہے۔

دورانِ سماعت مقتولہ بانو کی والدہ گل جان بی بی کو گرفتار کر کے عدالت میں پیش کیا گیا۔ عدالت نے انہیں 2 روزہ جسمانی ریمانڈ پر سیریس کرائم انویسٹی گیشن ونگ کے حوالے کر دیا ہے۔

قبل ازیں گل جان بی بی نے اپنی بیٹی کے قتل کو بلوچی رسم و رواج کا حصہ قرار دیا تھا اور اس سے قبل مبینہ قاتلوں کی رہائی کے لیے اپیل بھی کی تھی۔ ان کے اس بیان نے عوامی حلقوں میں شدید غم و غصے کو جنم دیا تھا۔

پولیس نے اس کیس میں دہشت گردی کی دفعات بھی شامل کی ہیں اور اب تک مجموعی طور پر 20 افراد کو گرفتار کیا جا چکا ہے، جن میں سے 11 کی گرفتاری کو باضابطہ طور پر ظاہر کیا گیا ہے۔

اس کیس کی مزید تفتیش جاری ہے اور پولیس کا کہنا ہے کہ وہ انصاف کی فراہمی کو یقینی بنائے گی۔

دوسری جانب عدالت نے دو روز قبل سردار شیر باز ستکزئی کو 10 روزہ جسمانی ریمانڈ پر پولیس کے حوالے کیا ہوا ہے۔