سانحہ ڈیگاری، سپریم کورٹ نے جرگوں کو غیر قانونی قراردیا تو کیوں چل رہے ہیں؟ سینیٹر فیصل سبزواری

ایم کیو ایم پاکستان کے سینیٹر فیصل سبزواری نے بلوچستان میں خاتون اور مرد کے قتل کے واقعے کی مذمت کرتے ہوئے کہا ہے کہ یہ قبائلی روایات نہیں ہوسکتیں۔

سینیٹ اجلاس میں اظہار خیال کرتے ہوئے فیصل سبزواری نے کہا کہ بلوچستان واقعہ اس لئے یہاں ڈسکس ہورہا ہے کہ اس کی ویڈیو آگئی۔ انہوں نے کہا کہ 2019میں سپریم کورٹ نے جرگہ کو غیرقانونی قرار دیدیا ہے، اگر سپریم کورٹ نے جرگے ختم کردئیے ہیں تو پھر کیوں ملک میں یہ جرگے چل رہے ہیں۔

فیصل سبزواری نے کہا کہ جن لوگوں نے خاتون اور مرد کو قتل کیا وہ ان کیخلاف مقدمہ بھی درج کروا سکتے تھے کیونکہ پاکستان میں غیر قانونی اور غیر اخلاقی کام کرنے پر سزائیں دینے کا قانون موجود ہے۔

فیصل سبزاوری نے کہا کہ جرگہ اس ملک کے قانون کے تحت غیرقانونی ہے ، غیرت کے نام پر کسی کو کوئی بھی قتل کردیا جاتا ہے، اس ملک کے حاضر سروس جج کو دھمکیاں دی جارہی ہیں اور ہم خاموش ہیں۔

انہوں نے کہا کہ  بلوچستان میں اس مرد اور عورت کے ساتھ زیادتی ہوئی ہے، سزا صرف ریاست دے سکتی ہے، قانون دے سکتا ہے۔