وزیراعلی خیبرپختونخوا جلسہ گاہ پہنچے بغیر راستے سے واپس روانہ

لاہور میں ہونے والے جلسے کا مقررہ وقت ختم ہونے پر پولیس نے پروگرام کو ختم کردیا اور اُس وقت تک وزیراعلیٰ خیبرپختونخوا قافلے کے ہمراہ نہیں پہنچ سکے۔

صوابی سے ایک بڑے قافلے کے ہمراہ روانہ ہونے والے وزیراعلیٰ گنڈا پور کو کئی مقامات پر رکاوٹیں ملیں جنہیں کھولنے کے چکر میں انہیں جلسہ گاہ تک پہنچنے میں تاخیر ہوئی۔ وہاں مقررہ وقت مکمل ہونے پر پولیس نے ڈپٹی کمشنر کے احکامات پر عمل کیا اور پنڈال میں داخل ہو کر 6 بجے کے بعد اسٹیج کو خالی کرادیا۔

وزیراعلی علی امین گنڈا پور لاہور میں رنگ روڈ تک پہنچنے اور وہاں مختصر خطاب کے بعد واپس روانہ ہوگئے۔ انہوں نے اپنے مختصر خطاب میں کہا کہ رکاوٹیں عبور کر کے یہاں تک پہنچا ہوں، میری حاضری قبول کریں، جلد عمران خان کو رہا کرواؤں گا۔

اس کے بعد وزیراعلی قافلے کے بعد خیبرپختونخوا کے لیے واپس روانہ ہوگئے۔ اس سے قبل انتظامیہ نے جلسہ گاہ اور اطراف کی بجلی منقطع کردی تھی جس کے باعث پنڈال اندھیرے میں ڈوب گیا تھا۔

دعوی

اس سے قبل دعویٰ کیا جارہا تھا کہ صوابی سے قافلے کے ہمراہ چلنے والے وزیراعلی خیبرپختونخوا رکاوٹیں عبور کرتے ہوئے جلسہ گاہ پہنچ گئے ہیں تاہم جس وقت وزیراعلی رنگ روڈ کے قریب پہنچے تو اُس وقت تک پولیس پنڈال خالی کراچکی تھی۔