عدالت کی حکومت کو 8 فروری تک بلاتعطل انٹرنیٹ کی فراہمی یقینی بنانے کی ہدایت

سندھ ہائیکورٹ نے ملک میں انٹرنیٹ سروس کی بار بار بندش اور تعطل  کیخلاف الیکشن تک تمام شہریوں کو انٹرنیٹ سروس بلا تعطل فراہم کرنے کا حکم دیدیا۔

چیف جسٹس سندھ ہائیکورٹ جسٹس عقیل احمد عباسی کی سربراہی میں دو رکنی بینچ کے روبرو ملک میں انٹرنیٹ سروس کی بار بار بندش اور تعطل کیخلاف پی ایس 110 کے امیدوار کی درخواست پر سماعت ہوئی۔

درخواست گزار وکیل نے موقف اپنایا کہ 17 دسمبر، 7 اور 20 جنوری کو ملک بھرمیں انٹرنیٹ کی سروس معطل رہی۔ مسلسل کی کئی روز سے ملک بھر میں انٹرنیٹ سروس تعطل کا شکار ہے۔

درخواست گزار نے مؤقف اختیار کیا کہ انٹرنیٹ سروس کی بلاجواز بندش اور تعطل سے امیدواروں کو انتخابی مہم چلانا مشکل ہوگیا ہے لہذا عدالت سے استدعا ہے کہ فریقین کو ہدایت کی جائے کہ عام انتخابات تک شہریوں کو سوشل میڈیا تک رسائی میں مداخلت نا کریں۔

عدالت نے حکم امتناع جاری کرتے ہوئے فریقین سے 29 جنوری تک جواب طلب کرلیا۔ عدالت نے الیکشن تک تمام شہریوں کو انٹرنیٹ سروس بلا تعطل فراہم کرنے کا حکم دیدیا۔