میٹا نے پاکستانی صارفین کو بڑی خوش خبری سنادی

عالمی ٹیکنالوجی کمپنی میٹا (Meta) نے پاکستانی صارفین کو خوشخبری سناتے ہوئے اپنے مصنوعی ذہانت کے پلیٹ فارم میٹا اے آئی (Meta AI) کا اردو ورژن متعارف کرادیا ہے۔

یہ اعلان اسلام آباد میں منعقدہ تقریب “Future in Focus: AI and Innovation” کے دوران کیا گیا، جو وزارتِ اطلاعات و ٹیلی کمیونیکیشن (MoITT) کے اشتراک سے منعقد ہوئی۔

اس موقع پر میٹا نے پاکستان میں ڈیجیٹل تبدیلی اور مصنوعی ذہانت کی تعلیم کے فروغ کے لیے متعدد نئی پہل کاریوں (initiatives) کا اعلان بھی کیا۔

مصنوعی ذہانت کے فروغ کے لیے نئے اقدامات

میٹا نے اس موقع پر اپنی گائیڈ کا مقامی ایڈیشن بھی جاری کیا جس کا عنوان “Transforming Public Sector Innovation in Asia Pacific with Llama” ہے۔

یہ دستاویز ڈیلوئٹ (Deloitte) کے اشتراک سے تیار کی گئی ہے، جس میں بتایا گیا ہے کہ میٹا کا اوپن سورس اے آئی ماڈل “Llama” کس طرح سرکاری اداروں میں آپریشنز کو بہتر بنا سکتا ہے، عوامی خدمات کی فراہمی کو مؤثر کرسکتا ہے اور ڈیٹا خودمختاری (Data Sovereignty) کو مضبوط بنا سکتا ہے۔

رپورٹ میں ایشیا پیسفک خطے کے مختلف ممالک، بشمول پاکستان کی کامیاب مثالوں اور بہترین پریکٹسز کو بھی شامل کیا گیا ہے۔

اے آئی لٹریسی پروگرام کا آغاز

میٹا نے اعلیٰ تعلیمی کمیشن (HEC)، نیشنل کمپیوٹنگ ایجوکیشن ایکریڈیٹیشن کونسل (NCEAC)، وزارتِ آئی ٹی اور ایٹم کیمپ (atomcamp) کے تعاون سے ایک نیا AI Literacy Programme بھی شروع کیا ہے۔

اس پروگرام کے تحت 350 غیر کمپیوٹر سائنس یونیورسٹی اساتذہ کو بنیادی اے آئی مہارتوں کی تربیت دی جائے گی تاکہ وہ مستقبل کے تکنیکی چیلنجز کے لیے طلبہ کو بہتر طور پر تیار کرسکیں۔

GDTX 2025 پروگرام کا اعلان

میٹا نے Government Digital Transformation Xperience (GDTX) 2025 پروگرام بھی متعارف کرایا، جس کا مقصد پاکستان کے سرکاری اداروں کو ڈیجیٹل تبدیلی، عالمی بہترین حکمتِ عملیاں اور میٹا کی جدید ٹیکنالوجیز سے فائدہ پہنچانا ہے۔

اس پروگرام کے تحت سرکاری و نجی ماہرین کو ایک پلیٹ فارم پر لا کر ڈیجیٹل گورننس سے متعلق تجربات اور تجاویز کا تبادلہ کیا جائے گا۔

وفاقی وزیر برائے انفارمیشن ٹیکنالوجی شزا فاطمہ خواجہ نے کہا کہ پاکستان اور میٹا کے درمیان یہ اشتراک ملک کے ڈیجیٹل وژن کی عکاسی کرتا ہے۔

انہوں نے کہا کہ “وزیراعظم کے ڈیجیٹل نیشن وژن کے تحت پاکستان ایک ایسے مستقبل کی جانب بڑھ رہا ہے جہاں ٹیکنالوجی ہر شہری کو بااختیار بناتی ہے۔ اردو زبان میں میٹا اے آئی کی شمولیت ایک اہم سنگِ میل ہے، جو ٹیکنالوجی کو سب کے لیے قابلِ رسائی بنائے گی تاکہ کوئی پیچھے نہ رہ جائے۔”

میٹا کے ڈائریکٹر پبلک پالیسی برائے جنوبی و وسطی ایشیا، سریم عزیز نے کہا کہ “ہمیں خوشی ہے کہ میٹا اے آئی اب اردو میں دستیاب ہے۔ یہ قدم پاکستانی صارفین کو اپنی زبان میں ٹیکنالوجی سے جڑنے کا نیا موقع فراہم کرے گا۔ ہمارا مقصد ہے کہ حکومتیں اور تعلیمی ادارے مصنوعی ذہانت کے ذریعے اپنی ڈیجیٹل تبدیلی کے سفر کو تیز تر بنا سکیں۔”