بجلی کا بل بھرنے کے باوجود بیٹا گرفتار، باپ کا صدمے سے انتقال

حیدرآباد : بجلی بل کی ادائیگی کے باوجود نوجوان کی بلا جواز گرفتاری کے صدمے میں بوڑھا باپ فانی دنیا کو خیر باد کہہ گیا۔

ذرائع کے مطابق حیدرآباد الیکٹرک سپلائی کمپنی (حیسکو)کے غیر ذمے دارانہ عمل کے باعث ایک اور گھر میں صف ماتم بچھ گیا۔

حیسکو عملے ادائیگیوں اور گرفتاریوں کی مہم کے سلسلے میں لیبر کالونی میں بلوں کی مسلسل ادائیگی کے باوجود نوجوان دانش کو پولیس کے ہاتھوں گرفتار کرا دیا۔

نوجوان کا ضعیف العمر باپ محمد عبدالمجید یہ صدمہ نہ جھیل سکا۔ یوں حیسکو کے غیر ذمے دارانہ عمل نے اس کی جان لے لی اور ایک ہنستا بستا گھر اجڑ گیا۔

اس حوالے سے ذرائع نے بتایا کہ حیسکو نے سائٹ تھانے میں لیبر کالونی کے رہائشی دانش سمیت 6 افراد کے خلاف مقدمہ درج کرایا تھا۔

 سائٹ پولیس نے 22 اپریل 2024 کو مقدمہ درج کرنے کے بعد ایک لاکھ 20 ہزار 416 روپے کا بل ادا نہ کرنے پر دانش کو گرفتار کر کے جیل بھیج دیا۔

نوجوان کا والد عبدالمجید نے قسطوں میں بل کا آدھا حصہ ادا کرنے کے بعد اپنے بیٹے کو رہا کرنے کی کوشش کی لیکن وہ رہا نہ ہو سکا۔

گزشتہ روز بوڑھا باپ مایوسی کے عالم میں گھر پہنچا جہاں پریشانی کے باعث حرکت قلب بند ہونے سے انتقال کر گیا۔ تاہم بیٹے کے جیل میں ہونے کی اس کی تدفین نہیں ہو سکی ہے۔

بتایا جا رہا ہے کہ اہل علاقہ باپ کی تدفین میں شرکت کے لیے بیٹے کی پے رول پر رہائی کی کوششیں کر رہے ہیں اس حوالے سے متعلقہ حکام کو درخواست بھی دی جا رہی ہے۔

اہل علاقہ نے ولید کی موت کا ذمے دار حیسکو کو قرار دیتے ہوئے اس کے خلاف مقدمہ درج کرنے کا مطالبہ کیا ہے۔