حیدرآباد سلینڈر دھماکے میں اموات 23 تک پہنچ گئیں

سندھ کے دوسرے بڑے شہر حیدرآباد کے علاقے پریٹ آباد میں ہونے والے گیس سلینڈر دھماکے کے مزید دو زخمی بچے دم توڑ گئے جس کے بعد اموات کی مجموعی تعداد 23 ہوگئی۔

تفصیلات کے مطابق کراچی کے اسپتالوں میں دونوں بچے زیر علاج تھے جنہوں نے بدھ کے روز دوران علاج دم توڑا۔ انتقال کرنے والوں میں 8 سالہ ماہنور حبیب اور دو سالہ حریم اکرم شامل ہیں۔

سانحہ پریٹ آباد میں زخمی ہونے والوں میں سے اب بھی پانچ کی حالت تشویشناک ہے۔

واضح رہے کہ حیدرآباد کے علاقے پریٹ آباد میں گیس سلینڈر کی فیلنگ کے دوران زور دار دھماکے کے نتیجے میں بہت تباہی ہوئی تھی جبکہ دکان میں موجود متعدد لوگ جھلس گئے تھے۔

واقعے میں 52 کے قریب لوگ زخمی ہوئے جن میں سے 31 کی حالت تشویشناک تھی اور ان میں سے کچھ کو کراچی کے سول اسپتال منتقل کیا گیا تھا۔