کچے کے ڈاکوؤں نے ایک بچے کو قتل کردیا، دوسرے کی رہائی کیلیے 1 کروڑ تاوان کا مطالبہ

سندھ کے علاقے کچے میں ایک افسوسناک واقعے میں ڈاکوؤں نے اغوا ہونے والے دو بچوں میں سے ایک کو قتل کر دیا جبکہ دوسرے بچے کی رہائی کے لیے ایک کروڑ تاوان کا مطالبہ کیا ہے۔

تفصیلات کے مطابق ڈاکوؤں نے کچے کے علاقے تھل میں رہائش پذیر اہل خانہ سے ٹیلی فون کے ذریعے رابطہ کیا اور اغوا کیے گئے بچوں نادر علی بنگلانی اور قدیر بنگلانی کی رہائی کے لیے ایک کروڑ روپے کا مطالبہ کیا، جو عید کے بعد سے لاپتہ تھے۔

کال کے دوران ڈاکوؤں نے گھر والوں کو بتایا کہ ایک بچہ مارا جا چکا ہے اور دوسرا ابھی تک ان کی تحویل میں ہے۔ انہوں نے بچ جانے والے بچے کی رہائی کے لیے تاوان کی ادائیگی پر اصرار کرتے ہوئے خاندان کو دھمکیاں دیں۔

متاثرہ خاندان نے سیکیورٹی ایجنسیز، صوبائی حکومت سمیت دیگر اعلیٰ حکام سے اپیل کی ہے کہ اُن کے بچے کو باحفاظت بازیاب کرایا جائے کیونکہ وہ تاوان کی رقم ادا نہیں کرسکتے۔

اس سے قبل 20 جون کو، سکھر کے علاقے میں گھوٹکی سے تعلق رکھنے والے دو ٹک ٹاک بھائیوں سمیت تین افراد کو اغوا کیا گیا تھا۔ متاثرین، جن کی شناخت دو بھائیوں جاوید اور خالد کے نام سے ہوئی ، اپنے دوست فرمان کے ساتھ، پانچ روز قبل ٹک ٹاک ویڈیوز بنانے سکھر جاتے ہوئے لاپتہ ہو گئے تھے۔

ایس ایس پی سمیر نور کے مطابق اغوا کاروں کی آخری معلوم لوکیشن شکارپور کے علاقے سے ٹریس کی گئی۔ اغوا کاروں نے ان کی رہائی کے لیے پچاس لاکھ روپے تاوان کا مطالبہ کیا ہے۔