کراچی میں اسپیڈ بریکر بھی موت کی وجہ بننے لگے، موٹر سائیکل سوار جاں بحق

شہر قائد کے علاقے کینٹ اسٹیشن کے قریب اسپیڈ دیکر کیوجہ سے موٹر سائیکل سوار جاں بحق ہوگیا۔

 تفصیلات کے مطابق کینٹ اسٹیشن کے قریب واقع اپارٹمنٹ کے پاس ٹریفک حادثے میں جاں بحق شہری کی شناخت 35 سالہ ناصر کے نام سے ہوئی جو موٹرسائیکل پر سوار تھا۔ 

پولیس نے بتایا کہ ابتدائی معلومات کے مطابق واقعہ موٹر سائیکل اسپیڈ بریکر سے اچھل کر گرنے کے باعث پیش آیا ہے، جس کے باعث سر پر گہری چوٹ لگنے کی وجہ سے موت واقع ہوگئی تاہم اس حوالے سے مزید تحقیقات جاری ہیں۔ 

ریسکیو رضاکاروں نے متوفی کی لاش کو ضابطے کی کارروائی کیلیے جناح اسپتال منتقل کیا اور پھر میت لواحقین کے حوالے کردی۔

.