لاہور میں اسموگ کی شدت انتہائی، شہریوں کو گھر سے باہر نہ نکلنے کا مشورہ

لاہور میں اسموگ کی شدت بڑھنے کے باعث حکام نے شہریوں کو غیر ضروری طور پر گھروں سے باہر نکلنے سے گریز کرنے کی ہدایت جاری کی ہے۔

اسموگ مانیٹرنگ سینٹر کے مطابق مشرقی ہواؤں کے باعث شہر میں آج فضائی آلودگی کی اوسط سطح (ایئر کوالٹی انڈیکس — AQI) 195 سے 210 کے درمیان رہنے کا امکان ہے۔

ماہرین کا کہنا ہے کہ صبح کے وقت درجہ حرارت میں کمی کے باعث آلودہ ذرات طویل وقت تک فضا میں معلق رہ سکتے ہیں، جس سے شہریوں کی صحت متاثر ہونے کا خدشہ ہے۔

حکام کے مطابق، شدید آلودگی والے علاقوں میں اینٹی اسموگ گنز تعینات کی جائیں گی تاکہ فضائی آلودگی کی سطح کو کم کیا جا سکے۔

واضح رہے کہ پنجاب کی سینئر وزیر مریم اورنگزیب نے حال ہی میں ایک پوسٹ میں بتایا تھا کہ لاہور کے کاہنہ علاقے میں پہلی بار اینٹی اسموگ گن کا استعمال کیا گیا، جس سے فضائی آلودگی میں 70 فیصد تک کمی واقع ہوئی۔

ان کے مطابق، اس تجربے کے بعد ایئر کوالٹی انڈیکس 666 سے کم ہو کر 170 پر آ گیا۔

مریم اورنگزیب نے مزید کہا کہ اب اینٹی اسموگ گنز کو دیگر متاثرہ علاقوں میں بھی استعمال کیا جائے گا تاکہ فضائی آلودگی میں مؤثر کمی لائی جا سکے اور شہریوں کے لیے صاف فضا کو یقینی بنایا جا سکے۔