میر رضا کیس، پولیس کا سم تک رسائی کا فیصلہ،پیشرفت کاامکان

جوڈیشل مجسٹریٹ ایسٹ کی عدالت نے نوجوان تاجر میر رضا کی ہلاکت کے مقدمے کی سماعت 24 اگست تک ملتوی کردی۔

سماعت کے دوران نئے تفتیشی افسر عدالت میں پیش ہوئے اور بتایا کہ تحقیقات آگے بڑھانے کے لیے میر رضا کے زیرِ استعمال سم درکار ہے۔

عدالت نے استفسار کیا کہ متوفی کی سم پولیس کس طرح حاصل کرے گی، جس پر تفتیشی افسر نے بتایا کہ میر رضا کی والدہ کے شناختی کارڈ اور بائیومیٹرک تصدیق کے ذریعے سم حاصل کرنے کی کوشش کی جائے گی۔

تفتیشی افسر نے آئندہ سماعت پر طبی معائنے اور تفتیشی رپورٹ بھی عدالت میں جمع کرانے کے لیے مزید مہلت طلب کی۔

عدالت نے پولیس کو مہلت دیتے ہوئے 24 اگست تک سماعت ملتوی کردی اور آئندہ پیشی پر مقدمے کی پیش رفت اور طبی معائنے سے متعلق رپورٹ جمع کرانے کی ہدایت کردی۔