پسند کی شادی پر لڑکی کو سسر اور باپ نے قتل کردیا

پنجاب کے ضلع حافظ آباد کے علاقے تاجپورہ کی رہائشی لڑکی کو باپ اور سسر نے پسند کی شادی کرنے پر قتل کردیا۔

پولیس کے مطابق لاہور یونیورسٹی میں زیر تعلیم مبشرہ نامی لڑکی نے تین روز قبل آئرلینڈ میں مقیم اویس نامی نوجوان سے آن لائن نکاح کیا جس کے بعد وہ اپنے سسرال ٹھٹھہ قادر چلی گئی۔

پولیس کے مطابق مقتولہ کے سسر عابد نے لڑکی کو گھر پر رکھنے سے انکار کیا اور والد جاوید پر زور دیا کہ وہ اسے اپنے ساتھ لے جائیں پھر دونوں نے ملکر لڑکی کو قتل کرنے کا منصوبہ بنایا اور والد نے گھر پر بلاکر سسر کے ساتھ ملکر لڑکی کو گلہ گھونٹ کر قتل کردیا۔

واقعے کے حوالے سے درج ایف آئی آر میں انکشاف کیا گیا ہے کہ قتل کے بعد باپ اور سسر نے ڈرامہ رچانے اور واردات چھپانے کے لیے لڑکی کو کرنٹ بھی لگائے تاکہ اغوا کا نام دیا جاسکے۔

پولیس نے باپ اور سسر کے خلاف مقدمہ درج کر کے لاش کو ضابطے کی کارروائی کیلیے ڈی ایچ کیو اسپتال منتقل کردیا۔