راولپنڈی: خود کو امریکی شہری ظاہر کر کے طالبات کو جنسی طور پر استعمال کرنے والا سیکیورٹی گارڈ گرفتار

وفاقی تحقیقاتی ایجنسی نے اسلام آباد میں کارروائی کرتے ہوئے ایک ایسے ملزم کو گرفتار کیا ہے جو نجی یونیورسٹی کا سیکیورٹی گارڈ تھا اور طالبات کو پھنسا کر اُن کا جنسی استحصال کرتا تھا۔

راولپنڈی ایف آئی اے سائبر کرائم ونگ کے مطابق ملزم کو اسلام آباد کے جناح ٹاؤن سے گرفتار کیا، جس کے موبائل سے طالبات کا نازیبا مواد بھی برآمد ہوا ہے جبکہ ملزم نے اسے سوشل میڈیا پر شیئر کرنے کا اعتراف بھی کیا۔

ترجمان ایف آئی اے کے مطابق ملزم خود کو امریکی شہری ظاہر کر کے طالبات کو سہانے خواب دکھا کر اُن سے دوستی کرتا اور پھر نازیبا حرکات کرتا تھا، ملزم نے کئی طالبات کا جنسی استحصال کیا۔

ملزم کی شناخت محمد جبار کے نام سے ہوئی جو امریکی شہری ہونے کے علاوہ خود کو ایف آئی اے کا افسر ظاہر کرتا تھا۔