سانگھڑ میں بورنگ کا پانی پینے سے 5 بچے لقمہ اجل بن گئے

سندھ کے شہر سانگھڑ میں بورنگ کا پانی پینے سے پانچ بچے جان کی بازی ہار گئے۔

ذرائع کے مطابق گاؤں نیاز محمد بھٹی میں دو روز میں ایک ہی خاندان کے پانچ بچے بورنگ کا پانی پینے سے خالق حقیقی سے جا ملے۔

ڈپٹی کمشنر سانگھڑ کا اس حوالے سے کہنا ہے کہ بچوں کو اُلٹی،بخار اور ڈائیریا کی شکایت پر  اسپتال لایا گیا تھا، بچوں کی عمریں 4 سے 8 سال کے درمیان ہیں۔

ڈی ایچ او سانگھڑ نے بتایا کہ واقعے کے بعد متاثرہ علاقے کا دورہ کیا اور واٹر پمپ کو سیل کردیا۔

ڈی ایچ او کے مطابق زیر زمین پانی کے نمونے لیبارٹری میں چیک کیے گئے، جس میں سینکھیا کی مقدار زیادہ پائی گئی،متاثرہ علاقے میں زیر زمین پانی کا استعمال کرنے سے منع کر دیا گیا۔