سانحہ گل پلازہ، اب صرف باقیات کی تلاش کا عمل رہ گیا ہے، سینئر فائر آفیسر

کراچی: سینئر فائر آفیسر ظفر خان نے کہا کہ گل پلازہ کی عمارت کے ملبے سے زیادہ تر ہڈیاں برآمد ہو رہی ہیں، مکمل لاشیں کم ہی مل رہی ہیں۔

 انہوں نے کہا کہ عمارت کا اسٹرکچر شدید متاثر ہوگیا ہے اور اب صرف باقیات کی تلاش کا عمل رہ گیا ہے۔گل پلازہ میں آتشزدگی کے افسوسناک واقعے کو سات دن گزر جانے کے باوجود ریسکیو اینڈ سرچ آپریشن جاری ہے، سانحے میں اب تک 67 لاپتا افراد کی لاشیں نکال لی گئی ہیں جبکہ 77 افراد لاپتہ ہیں جن کی تلاش کا عمل بدستور جاری ہے۔

ترجمان محکمہ صحت کے مطابق اب تک لاشوں اور جسم کے مختلف اعضا سے 45 ڈی این اے کے نمونے حاصل کیے گئے ہیں، جن میں سے 8 افراد کی شناخت ڈی این اے کے ذریعے مکمل ہو چکی ہے۔

ڈپٹی کمشنر سائوتھ نے بتایا کہ سرچ آپریشن کا تقریبا 50 فیصد حصہ مکمل ہو چکا ہے اور اسی تناسب سے لاشیں بھی برآمد کی جا چکی ہیں۔

انہوں نے مزید کہا کہ ملبے کے انتہائی خطرناک اور کمزور اسٹرکچر کی وجہ سے سرچنگ انتہائی محتاط انداز میں جاری ہے۔ ریسکیو ٹیمیں اور فائر بریگیڈ کی ٹیمیں ملبے کے مختلف حصوں میں کام کر رہی ہیں تاکہ مزید لاپتہ افراد کو تلاش کیا جا سکے۔

حکام نے بتایا کہ یہ کارروائی وقت طلب ہے اور اس دوران حفاظتی اقدامات کو اولین ترجیح دی جا رہی ہے۔کراچی پولیس سرجن ڈاکٹر سمیعہ سید نے بتایا کہ لاشوں کی باقیات سوختہ ہیں، نمونہ لینے میں مشکلات کا سامنا ہے۔

پولیس سرجن کے مطابق لاشوں اور انسانی باقیات کے مجموعی ڈی این اے سیمپلز کی تعداد 67 تک پہنچ چکی، اب تک نکالی جانے والی 67 لاشوں اور انسانی باقیات میں سے 62 کا پوسٹ مارٹم مکمل کر لیا گیا۔

دوسری جانب فائر فائٹر حکام نے کہا کہ گل پلازہ کا سرچ آپریشن اسی فیصد مکمل ہوچکا ہے، تاہم ملبہ ہٹانے میں دو سے چار روز لگ سکتے ہیں۔