ایف آئی اے نے ریڈ بک کا انتہائی مطلوب انسانی اسمگلر گرفتار کرلیا

راولپنڈی:ایف آئی اے امیگریشن نے اسلام آباد ایئرپورٹ پر کارروائی میں 17 سال سے مطلوب ریڈ بک کے انتہائی مطلوب انسانی اسمگلر کو حراست میں لے لیا۔

ذرائع کے مطابق ملزم کی شناخت امجد علی کے نام سے ہوئی جس کا تعلق گوجر خان سے ہے، ملزم کے خلاف 2007 میں اینٹی ہیومن ٹریفکنگ سرکل راولپنڈی میں مقدمہ درج ہوا تھا۔

 ملزم ویزا فراڈ کر کے بیرون ملک فرار ہو گیا تھا۔ملزم کا نام ریڈ بک کے انتہائی مطلوب انسانی اسمگلروں میں شامل تھا۔

ملزم کا نام اسٹاپ لسٹ میں شامل تھا جس کی بنیاد پر ملزم کو گرفتار کیا گیا، ملزم کو بعد ازاں اینٹی ہیومن ٹریفکنگ سرکل راولپنڈی منتقل کر دیا گیا جہاں اس سے مزید تفتیش جاری ہے۔