بابر اعظم نے عالمی سطح پر بڑا اعزاز حاصل کرلیا، کامیابی کا تسلسل جاری

قومی کرکٹ ٹیم کے سابق کپتان اور بلے باز نے عالمی ریکارڈ اپنے نام کرلیا اور وہ زیادہ رنز بنانے والے کھلاڑیوں کی فہرست میں تیسرے نمبر پر آگئے۔

نیوزی لینڈ کے خلاف سیریز کے پہلے ٹی20 میچ میں 35 گیندوں پر 6 چوکوں اور 2 چھکوں کی مدد سے 57 رنز کی اننگز کھیلنے کے بعد بابراعظم ٹی20 فارمیٹ میں سب سے زیادہ رنز اسکور کرنے والے تیسرے عالمی بلےباز بن گئے ہیں۔

بابراعظم نے پاکستان کی نمائندگی کرتے ہوئے 105 ٹی20 میچز میں 42.12 کی اوسط سے 3 ہزار 538 رنز اسکور کیے ہیں۔

عالمی فہرست کے مطابق بھارتی بلے باز ویرات کوہلی 115 میچز میں 4 ہزار 8 رنز بنا کر پہلے، روہت شرما 148 میچز میں 3 ہزار 538 رنز بنا کر دوسرے نمبر پر ہیں۔

ٹاپ ٹین میں بابر اعظم کے علاوہ قومی کرکٹ ٹیم کے وکٹ کیپر اور بلے باز محمد رضوان بھی موجود ہیں جنہوں نے 86 میچز میں 48.66 کی اوسط سے 2 ہزار 822 رنز بنائے ہیں۔