بابر اعظم نے ون ڈے کا نیا ریکارڈ بناکر کوہلی سمیت دیگر کو پیچھے چھوڑ دیا

پاکستان کے اسٹار بلے باز بابر اعظم نے جمعے کے روز نیوزی لینڈ کے خلاف سہ ملکی سیریز کے فائنل میچ میں ایک اور شاندار سنگ میل عبور کرکے کوہلی سمیت دیگر بلے بازوں کو پیچھے چھوڑ دیا۔

بابر اعظم نے ون ڈے انٹرنیشنل (ODI) کرکٹ میں 6 ہزار رنز مکمل کر لیے۔ نیشنل بینک اسٹیڈیم میں کھیلے گئے میچ کے دوران، 30 سالہ بابر اعظم پاکستان کے 11ویں کرکٹر بن گئے ہیں جنہوں نے ون ڈے فارمیٹ میں 6 ہزار رنز کا ہندسہ عبور کیا۔

بابر اعظم نے اپنے ون ڈے کیریئر میں 34 نصف سنچریاں اور 19 سنچریاں اسکور کی ہیں۔

اس فہرست میں سابق کپتان انضمام الحق 11 ہزار 701 رنز کے ساتھ سرفہرست ہیں، جبکہ محمد یوسف (9,554 رنز) اور سعید انور (8,824 رنز) بالترتیب دوسرے اور تیسرے نمبر پر ہیں۔

بابر اعظم نے یہ کارنامہ صرف 123 اننگز میں مکمل کر کے جنوبی افریقہ کے عظیم بلے باز ہاشم آملہ کے ریکارڈ کو برابر کر دیا ہے، جو ون ڈے میں تیز ترین 6 ہزار رنز بنانے کا اعزاز رکھتے تھے۔

تیز ترین 6 ہزار ون ڈے رنز بنانے والے کھلاڑیوں کی فہرست میں بابر اعظم اور ہاشم آملہ مشترکہ طور پر پہلے نمبر پر ہیں، جبکہ بھارت کے ویرات کوہلی (136 اننگز)، نیوزی لینڈ کے کین ولیمسن (139 اننگز)، اور آسٹریلیا کے ڈیوڈ وارنر (139 اننگز) بالترتیب اس فہرست میں شامل ہیں۔

بابر اعظم ون ڈے کرکٹ میں تیز ترین 5 ہزار رنز بنانے کا ریکارڈ بھی اپنے نام کر چکے ہیں، جو انہوں نے صرف 97 اننگز میں مکمل کیا تھا۔ اس کے علاوہ، وہ سعید انور کے پاکستان کے لیے 20 ون ڈے سنچریز کے ریکارڈ کو برابر کرنے سے صرف ایک سنچری دور ہیں۔