ترین گروپ ملتان سلطانز چھوڑنے کے بعد پی ایس ایل کی نئی فرنچائز کی خریداری کیلئے سرگرم

ترین گروپ نے پاکستان سپر لیگ (پی ایس ایل) کی نئی فرنچائزز کے لیے بولی کے عمل میں دوبارہ شمولیت اختیار کر لی ہے۔ یہ پیش رفت ایسے وقت سامنے آئی ہے جب ایک ماہ قبل علی ترین نے ملتان سلطانز کی ملکیت سے علیحدگی اختیار کی تھی۔

میڈیا رپورٹس کے مطابق ترین گروپ نے پی ایس ایل میں شامل ہونے والی دو نئی ٹیموں کے لیے درکار دستاویزات جمع کرا دی ہیں۔ بولی کے اس عمل میں پاکستان اور بیرونِ ملک سے مجموعی طور پر 11 دیگر سرمایہ کار بھی حصہ لے رہے ہیں، جن میں متحدہ عرب امارات، امریکا، آسٹریلیا اور کینیڈا کی کمپنیاں شامل ہیں، تاہم ان کی شمولیت لیگ کے طے کردہ تکنیکی معیار سے مشروط ہوگی۔

پی ایس ایل کی نئی فرنچائزز کے لیے بولی 8 جنوری کو اسلام آباد کنونشن سینٹر میں ہونے جا رہی ہے۔

دوسری جانب توقع کی جا رہی ہے کہ ملتان سلطانز اور اس کے موجودہ مالکان کے درمیان علیحدگی کا فیصلہ 31 دسمبر کو پی ایس ایل گورننگ بورڈ کی منظوری کے بعد حتمی شکل اختیار کر لے گا۔ حالیہ مہینوں میں فرنچائز اور لیگ انتظامیہ کے تعلقات میں کشیدگی کی اطلاعات بھی سامنے آتی رہی ہیں۔

علی ترین نے پی ایس ایل انتظامیہ پر تنقید کرتے ہوئے پوڈکاسٹس اور سوشل میڈیا کے ذریعے اپنے تحفظات کا اظہار کیا تھا۔ ایک موقع پر انہوں نے پی ایس ایل بورڈ کی جانب سے موصول ہونے والا نوٹس پھاڑتے ہوئے ویڈیو بھی شیئر کی تھی، جس پر خاصی توجہ دی گئی۔

یہ بھی قابلِ ذکر ہے کہ دیگر چھ فرنچائزز کے برعکس ملتان سلطانز کو نظرثانی شدہ فیس اسٹرکچر کے تحت توسیع کی پیشکش نہیں کی گئی تھی۔