بدنام زمانہ اسکینڈل ایپسٹین فائلز میں نام آنے پر ناروے کے وزیراعظم کا اقدام خودکشی

ناروے کے سابق وزیرِاعظم اور ناروے کی نوبل کمیٹی کے سابق چیئرمین تھوربیورن یاگلینڈ کو مبینہ طور پر خودکشی کی کوشش کے بعد اسپتال منتقل کر دیا گیا ہے۔ غیر ملکی میڈیا رپورٹس کے مطابق 75 سالہ یاگلینڈ کو گزشتہ ہفتے کے آخر میں طبی امداد کے لیے داخل کیا گیا، جہاں ان کی حالت تشویشناک بتائی جا رہی ہے۔ تاہم حکام نے یہ واضح نہیں کیا کہ انہیں کس اسپتال میں رکھا گیا ہے۔

یہ پیش رفت اس وقت سامنے آئی ہے جب ناروے کی پولیس اور ملک کے معاشی جرائم کی تحقیقاتی ادارے اوکوکریم نے حال ہی میں جاری ہونے والی ایپسٹین فائلز کے بعد یاگلینڈ کے خلاف تحقیقات شروع کیں۔

رپورٹس میں دعویٰ کیا گیا ہے کہ ان دستاویزات میں یاگلینڈ اور جیفری ایپسٹین کے درمیان طویل عرصے سے تعلقات کے شواہد موجود ہیں، جن میں پرتعیش سفری سہولیات اور مہمان نوازی کی پیشکشیں شامل ہیں۔

تھوربیورن یاگلینڈ 1990 کی دہائی میں ناروے کے وزیرِاعظم رہ چکے ہیں اور بعد ازاں کونسل آف یورپ کے سیکریٹری جنرل بھی مقرر ہوئے۔ وہ 2009 سے 2015 تک ناروے کی نوبل کمیٹی کے سربراہ بھی رہے۔

میڈیا رپورٹس کے مطابق رواں ماہ کے آغاز میں حکام نے تحقیقات کے سلسلے میں یاگلینڈ سے منسلک متعدد مقامات پر چھاپے بھی مارے۔ تاہم ان کی جانب سے اب تک اس معاملے پر محدود بیانات سامنے آئے ہیں جبکہ قانونی کارروائی کا عمل جاری ہے۔