بھارت: جیل میں قیدی کی پوتی کو ہوس کیلئے بلانے والا جیلر معطل

بھارتی ریاست تامل ناڈو کے مدورائی سینٹرل جیل کے اسسٹنٹ جیلر کو ایک قیدی کی پوتی اپنی ہوس پوری کرنے کے لئے بلانے پر معطل کردیا گیا۔

غیر ملکی ذرائع ابلاغ کے مطابق مدورائی کے اسسٹنٹ جیلر کو قیدی کی پوتی کو اکیلے میں گھر آنے کا کہنے اور نامناسب رویے کا مقدمہ درج ہونے کے باعث معطل کردیا گیا۔

رپورٹس کے مطابق اسسٹنٹ جیلر بالاگور سوامی اس لڑکی سے واقف تھا کیونکہ وہ جیل میں اپنے رشتے دار سے اکثر ملنے کے لئے آتی تھی، اپنی واقفیت کا فائدہ اٹھاتے ہوئے جیلر نے اسے مبینہ طور پر اپنے گھر اکیلے آنے کے لئے دبائو ڈالا۔

لڑکی نے پولیس میں اس معاملے کی شکایت درج کرائی، جس کے نتیجے میں بالاگورسوامی کی معطلی اور قانونی کارروائی شروع کی گئی ہے۔ لڑکی کی شکایت کے بعد اس کے خاندان کے دیگر افراد نے عوامی مقام پر جیلر کر گھیر کر اس پر حملہ بھی کیا تھا جس کے بعد اسے تھانے منتقل کردیا گیا۔

مزید تحقیقات کے بعد علم ہوا کہ اس سے قبل بھی بالاگورسوامی مختلف قیدیوں کی خواتین رشتے داروں کے ساتھ اس طرح کا نامناسب سلوک کرتا رہا ہے ۔