جوہری مذاکرات کا دوسرا دور، ایرانی وزیرخارجہ کا اہم بیان

تہران: ایران امریکا جوہری مذاکرات کا روم میں دوسرا دور ہوا، چار گھنٹے تک عمان کی ثالثی میں بالواسطہ بات چیت ہوئی۔

امریکی ٹی وی نے بتایاکہ ایرانی وزارت خارجہ کے مطابق روم میں عمان کے سفیر کی رہائش گاہ پر امریکی اور ایرانی وفود الگ الگ کمروں میں بیٹھے اور عمان کے وزیرخارجہ نے پیغامات کا تبادلہ کیا۔

ترجمان کا کہنا تھا ایران سنجیدگی سے مذاکرات میں حصہ لے رہا ہے ، غیرقانونی پابندیاں قابلِ اعتماد ضمانتوں کے ساتھ ہٹانی ہوں گی ، ایران کے لیے جوہری تکنیکی کامیابیوں کا تحفظ لازم ہے ، اس پر بات چیت ممکن نہیں۔

عمانی وزارت خارجہ کے مطابق بات چیت ایران کو جوہری ہتھیاروں سے پاک کرنے، پابندیوں کے خاتمے اور  پرامن جوہری پروگرام کا حق دینے پر مرکوز رہی۔

دونوں ملکوں کے درمیان بات چیت کا اگلا دور عمان میں ہوگا۔ ایرانی وزیر خارجہ عباس عراقچی نے گفتگو کو تعمیری قرار دیا ہے اور کہا ہے کہ تکنیکی ملاقاتوں کے بعد امید ہے اگلے ہفتے معاہدے کے امکان کا فیصلہ کرنے کے قابل ہوں گے۔

ان کا یہ بھی کہنا تھا کہ بہت زیادہ خوش امیدی اور بہت زیادہ مایوسی کے بجائے ہمیں درمیانی راستے پر رہنا ہوگا۔