خود کو مسلمان ظاہر کر کے جہاز کو بم سے اڑانے اور ٹرمپ مخالف نعرے لگانے والا بھارتی شرپسند برطانیہ میں گرفتار

لندن: لوٹن سے گلاسگو جانے والی ایزی جیٹ کی پرواز میں ایک شخص کو زور زور سے اسلامی نعرے لگانے اور بم کی جعلی دھمکی دے کر خوف و ہراس پھیلانے کے الزام میں گرفتار کر لیا گیا۔

ابھے نائیک نامی یہ شخص، جس کے بارے میں بتایا جاتا ہے کہ وہ ہندوستانی نژاد ہے، ایک ساتھی مسافر کی بنائی گئی ویڈیو میں "امریکہ مردہ باد،" "ٹرمپ مردہ باد،" اور "اللہ اکبر" جیسے نعرے لگاتا ہوا دکھائی دے رہا ہے۔

اس نے یہ بھی دعویٰ کیا کہ وہ امریکی صدر ڈونلڈ ٹرمپ کو پیغام دینا چاہتا تھا، جو اس وقت برطانیہ کے دورے پر تھے۔

 نائیک نے اس دوران بم کی دھمکیاں بھی دیں۔

اس کے رویے سے پریشان ہو کر دو مسافروں نے نائیک کو قابو کر لیا اور اسے طیارے کے فرش پر اس وقت تک دبائے رکھا جب تک پرواز بحفاظت لینڈ نہیں کر گئی۔

واقعے کے بعد، 41 سالہ نائیک کو حراست میں لے لیا گیا اور اس پر حملے اور طیارے کی حفاظت کو خطرے میں ڈالنے کے الزامات عائد کیے گئے۔

یہ ویڈیو، جو تیزی سے آن لائن وائرل ہوئی، جاری تحقیقات کے حصے کے طور پر انسداد دہشت گردی پولیس نے اس کا جائزہ لیا۔ تاہم، لوٹن سے تعلق رکھنے والے ابھے نائیک کو دہشت گردی کے الزامات کا سامنا نہیں کرنا پڑا۔

ملزم کو پیسلے شیرف کورٹ میں پیش کیا گیا، جہاں اس نے باضابطہ طور پر الزامات کا جواب نہیں دیا۔ اسے ریمانڈ پر تحویل میں بھیج دیا گیا ہے اور وہ مستقبل کی سماعت کے لیے دوبارہ عدالت میں پیش ہوگا۔