لاس اینجلس، آگ کی وجہ سے خالی ہونے والے گھروں میں چوری اور لوٹ مار کی وارداتیں

امریکی ریاست کیلی فورنیا کے علاقے لاس اینجلس کے جنگلات میں لگی آگ کے باعث خالی کرائے گئے گھروں میں لوٹ مار اور چوریوں کی وارداتیں ہونے کا انکشاف ہوا ہے۔ 

لاس اینجلس کے گورنر نے چوریوں کی رپورٹس کا نوٹس لیتے ہوئے پولیس کو متاثرہ علاقے میں تعینات کردیا ہے جبکہ غیر ملکی میڈیا کے مطابق لاس اینجلس کاؤنٹی کے شیرف رابرٹ لونا نے تصدیق کی ہے کہ آگ کے باعث خالی کرائی گئی املاک میں لوٹ مار اور چوریوں کے واقعات میں اضافہ ہوا ہے۔

انہوں نے بتایا کہ گھروں میں چوریاں اور لوٹ مار کرنے کے الزام میں 20 افراد کو گرفتار کیا گیا۔ جن کے پاس سے قیمتی اشیا اور نقدی بھی برآمد ہوئی ہے۔

واضح رہے کہ لاس اینجلس کے جنگلات میں لگنے والی آگ کے نتیجے میں ہزاروں ایکڑ زمین جبکہ 35 ہزار کے قریب رہائشی عمارتیں جل کر راکھ ہوگئیں ہیں جبکہ آتشزدگی کے دوران 11 افراد ہلاک اور متعدد کو طبعیت خراب ہونے پر اسپتال منتقل کیا گیا ہے۔

امریکی میڈیا رپورٹ کے مطابق آتشزدگی کے نتیجے میں اربوں ڈالر کا نقصان ہوا ہے اور چار روز کے بعد بھی آگ پر قابو نہیں پایا جاسکا تاہم ہوا میں کمی کے بعد اب آگ مزید پھیلنے سے رُک ضرور گئی ہے۔