سعودی عرب میں مزید 18 ہزار تارکین گرفتار

ریاض: سعودی عرب میں غیرقانونی تارکین وطن کے خلاف کریک ڈائون جاری ہے اور ایک ہفتے کے دوران مزید 18ہزار افراد کو گرفتار کیا گیا ہے۔

 سعودی وزارت داخلہ کا کہنا تھا کہ گزشتہ ایک ہفتے میں سعودی عرب کے مختلف ریجنز میں تفتیشی کارروائیوں کے دوران 18 ہزار سے زائد غیرقانونی تارکین وطن کو گرفتار کیا گیا۔

وزارت داخلہ کی جانب سے جاری رپورٹ میں مزید کہا گیا ہے کہ سعودی عرب کے مختلف شہروں میں قانون نافذ کرنے والے ادارے کی تفتیشی ٹیموں نے غیرقانونی تارکین کے خلاف مہم کے دوران اقامہ قوانین کی خلاف ورزیوں پر 11 ہزار 442 افراد کو حراست میں لیا۔

سرحدی قوانین کی خلاف ورزی کرتے ہوئے سعودی عرب میں غیرقانونی طورپر داخل ہونے کے الزام میں 1 ہزار 762 تارکین کو گرفتار کیا گیا جن میں 46 فیصد یمنی ، 53 فیصد ایتھوپین اور ایک فیصد کا تعلق مختلف ممالک سے تھا۔

تفتیشی ٹیموں نے قانون محنت کی خلاف ورزی کرنے پر 2 ہزار 827 تارکین کو حراست میں لیا جن کا کیس وزارت محنت کے حوالے کردیا گیا جہاں ان سے مکمل تفتیش کے بعدان کے بارے میں فیصلہ کیا جائے گا۔

وزارت داخلہ کا مزید کہنا تھا کہ گرفتار شدگان میں 46 افراد بھی شامل تھے جوغیرقانونی طریقے سے سعودی عرب سے باہر جانے کی کوشش کررہے تھے جبکہ 11 افراد کو اقامہ و رہائشی قوانین کی خلاف ورزی کرنے والے غیرقانونی تارکین کو پناہ اور ٹرانسپورٹ کی سہولت فراہم کرنے پر حراست میں لیا گیا۔