کراچی سے ایک اور چوریاں کر کے کروڑ پتی بننے والا گھریلو ملازم گرفتار، 21 سونے کے بسکٹ برآمد

ساحل پولیس نے کارروائی کرتے ہوئے ایک لکھ پتی گھریلو ملازم کو گرفتار کرلیا جو مبینہ طور پر اپنے مالک کے گھر سے بھاری رقم اور قیمتی زیورات چوری کرچکا تھا۔

پولیس کے مطابق گرفتار ملزم کی شناخت واجد علی کے نام سے ہوئی ہے، جو گزشتہ 8 برسوں سے متاثرہ خاتون کے گھر میں ملازمت کر رہا تھا۔ ابتدائی تفتیش میں ملزم نے نقد رقم، سونا، غیر ملکی کرنسی اور دیگر قیمتی سامان چوری کرنے کا اعتراف کیا ہے۔

تحقیقاتی ٹیم نے ملزم کے قبضے سے سونے کے بسکٹ اور 2 لاکھ 27 ہزار روپے نقدی برآمد کرلی ہے۔ پولیس کا کہنا ہے کہ ملزم نے چوری کی رقم سے جائیداد اور گاڑیاں خریدنے کا بھی انکشاف کیا ہے۔

ذرائع کے مطابق، پولیس نے ملزم کے بینک اکاؤنٹس اور جائیداد سے متعلق تفصیلات حاصل کرنا شروع کردی ہیں جبکہ مزید تفتیش کے لیے اسے تفتیشی حکام کے حوالے کر دیا گیا ہے۔

پولیس حکام کا کہنا ہے کہ ملزم کے نیٹ ورک یا ممکنہ معاونین کے بارے میں بھی تحقیقات جاری ہیں۔