سعودی عرب کا ایشیائی ممالک کے لیے تیل سستا کرنے کا اعلان

سعودی عرب نے ایشیائی ممالک کو فروخت کیے جانے والے خام تیل کی قیمت میں نمایاں کمی کرنے کا فیصلہ کیا ہے۔

غیر ملکی میڈیا رپورٹس کے مطابق سرکاری تیل کمپنی سعودی آرامکو آئندہ ماہ ایشیائی خریداروں کے لیے عرب لائٹ خام تیل کی قیمت میں 11 ڈالر فی بیرل کمی کرے گی، جس کے بعد اس کی قیمت علاقائی معیار کے مقابلے میں 1.50 ڈالر فی بیرل کم ہو جائے گی۔

رپورٹس کے مطابق مارکیٹ ماہرین نے اس سے قبل تقریباً 8 ڈالر فی بیرل کمی کی پیش گوئی کی تھی، تاہم سعودی آرامکو نے اس سے زیادہ کمی کا اعلان کیا ہے۔

تجزیہ کاروں کا کہنا ہے کہ یہ فیصلہ عالمی تیل مارکیٹ میں بدلتی ہوئی صورتحال اور ایشیائی منڈیوں کے لیے سعودی عرب کی قیمتوں سے متعلق نئی حکمت عملی کا حصہ ہے۔