سونا غریب کی پہنچ سے مزید دور، فی تولہ قیمت ڈھائی لاکھ روپے سے تجاوز کرگئی

کاروباری ہفتے کے پہلے روز پاکستان میں سونے کی قیمت یک دم دو ہزار سے زائد کا اضافہ ریکارڈ کیا گیا ہے۔

عالمی مارکیٹ میں ٹریڈنگ کے دوران سونے کی فی اونس قیمت 25 ڈالر اضافے کے بعد 2439 ڈالر فی اونس کی سطح پر پہنچی۔

بین الاقوامی بلین مارکیٹ میں اضافے کے باعث مقامی صرافہ مارکیٹوں میں پیر کو فی تولہ سونے کی قیمت 2300روپے کے بڑے اضافے کے بعد ڈھائی لاکھ چار سو روپے پر پہنچ گئی۔ 

اسی طرح فی دس گرام سونے کی قیمت بھی 1972روپے کے اضافے سے 214678روپے کی سطح پر آگئی۔ مقامی مارکیٹ میں عوام کی قوت خرید نہ ہونے اور تجارتی سرگرمیوں کے متاثر ہونے کے خطرے کے پیش نظر انڈر کاسٹنگ چار ہزار روپے رکھی گئی ہے۔

دوسری جانب فی تولہ چاندی کی قیمت بغیر کسی تبدیلی کے 2850روپے اور فی دس گرام چاندی کی قیمت 2443.41روپے پر مستحکم رہی۔