عماد وسیم کی مبینہ گرل فرینڈ نائلہ راجہ نے خاموشی توڑ دی

کراچی: قومی ٹیم کے سابق آل راؤنڈر عماد وسیم کی جانب سے طلاق کے اعلان کے بعد ثانیہ اشفاق نے بھی اپنا ردعمل دیا اور اب عماد وسیم کی مبینہ گرل فرینڈ نائلہ راجہ کا بیان سامنے آیا ہے جس نے نیا ہنگامہ کھڑا کر دیا۔

تفصیلات کے مطابق ڈیجیٹل کریئیٹر اور وکیل نائلہ راجہ نے عماد وسیم کی سابقہ اہلیہ ثانیہ اشفاق کے بارے میں سخت ردعمل کا اظہار کیا ہے، جس کے بعد سوشل میڈیا صارفین کی جانب سے نائلہ راجہ کو شدید تنقید کا نشانہ بنایا جانے لگا۔

رپورٹس کے مطابق نائلہ راجہ نے جولائی 2025 میں سوشل میڈیا پر اس وقت شہرت حاصل کی جب کئی صارفین نے عماد وسیم اور نائلہ راجہ کو ایک ساتھ دیکھا تھا جبکہ اس وقت ثانیہ اشفاق ان کے تیسرے بچے کی امید سے تھیں۔

نائلہ راجہ نے ایک طویل پیغام میں کہا کہ اگر کوئی شخص واقعی ثبوت رکھتا ہے تو اسے مناسب قانونی محکموں میں پیش کرنا چاہیے۔ نائلہ نے وضاحت کی کہ بدنامی صرف جھوٹے اور نقصان پہنچانے والے دعوں پر لاگو ہوتی ہے اور اگر کوئی اصل ثبوت پیش کرنا چاہتا ہے تو کوئی بھی اسے روک نہیں سکتا۔

 انہوں نے لوگوں کو الزام تراشی میں مشغول ہونے کے بجائے قانونی راستہ اختیار کرنے کا کہا۔

تاہم نائلہ کے اس ردعمل پر سوشل میڈیا صارفین نے نیا ہنگامہ کھڑا کر دیا، کئی لوگوں نے نائلہ کو گھر توڑنے والی یا جھوٹا قرار دیتے ہوئے کڑی تنقید کی۔ ایک صارف نے لکھا کہ ایسا کانفیڈینس ہونا چاہیے کہ سب کچھ کر کے بھی ہم تو اینوسینٹ ہیں۔