ٹک ٹاک نے پاکستانیوں کے لیے نیا خودکار اشتہاری نظام متعارف کرادیا

 کراچی: ٹک ٹاک نے پاکستانیوں کے لیے ایک نیا خودکار اشتہاری نظام متعارف کرایا ہے، جس کا مقصد چھوٹے اور درمیانے درجے کے کاروباروں کو ڈیجیٹل تشہیر کے میدان میں مزید مضبوط بنانا ہے۔

تفصیلات کے مطابق اس اقدام کے ذریعے پاکستانی کاروباری ادارے اپنے برانڈ کی ترقی کے لیے ٹک ٹاک پلیٹ فارم کی وسیع رسائی اور اثر پذیری سے فائدہ اٹھا سکیں گے۔

پاکستانیوں کے لیے یہ نیا سیلف سروس اشتہاری نظام، جسے ٹک ٹاک فار بزنس ایڈز منیجر کہا جاتا ہے، کاروباری افراد کو ایسے جدید اور مثر ٹولز فراہم کرتا ہے جن کے ذریعے وہ ٹک ٹاک کی تخلیقی کمیونٹی سے جڑ سکتے ہیں، نئی آڈئینس تک اپنی رسائی بڑھا سکتے ہیں اور ایک سادہ و آسان پلیٹ فارم کے ذریعے اپنی مارکیٹنگ مہمات کو بہتر انداز میں ترتیب دے سکتے ہیں۔

اس سہولت کا اجرا پاکستان میں مقامی کاروباروں کی حوصلہ افزائی کے لیے ٹک ٹاک کے طویل المدتی عزم کا حصہ ہے۔ اس سے قبل بھی ٹک ٹاک مختلف اقدامات کے ذریعے کاروباری افراد کی معاونت کرتا رہا ہے، جن میں گرو ود ٹک ٹاک کے تحت منعقدہ ماسٹرکلاسز شامل ہیں۔

ان پروگرامز کے ذریعے چھوٹے اور درمیانے درجے کے کاروباروں کو عملی تربیت، تخلیقی وسائل اور مثر حکمتِ عملی فراہم کی گئی، تاکہ وہ پلیٹ فارم پر اپنی موجودگی کو مزید مثر بنا سکیں۔