عالمی شہرت یافتہ لیجنڈ معین اختر کا 75 واں یوم پیدائش

کراچی: معروف کامیڈین معین اختر کا 75 واں یوم پیدائش آج  24 دسمبر بدھ کو منایا جارہا ہے، ان کے مداح آج تک ان کے لاجواب فن کے گرویدہ ہیں۔

لاجواب ڈائیلاگ ڈلیوری اور ہر کردار میں حقیقت کا رنگ بھر دینے کا فن رکھنے والے معین اختر 24 دسمبر 1950ء کراچی میں پیدا ہوئے ان کو اگر پاکستانی تاریخ کا سب سے ورسٹائل فنکار کہا جائے تو شاید غلط نہ ہوگا۔

ٹی وی ڈرامے ہوں یا پھر سلور اسکرین معین اختر نے ہر جگہ اپنی لازوال اداکاری کے انمٹ نقوش چھوڑے،ڈرامہ سیریل روزی، میں وہ اپنے فن کی بلندیوں پر نظر آئے۔

صرف یہی نہیں آنگن ٹیڑھا، انتظار فرمائیے، بندر روڈ سے کیماڑی،ہاف پلیٹ اور عید ٹرین جیسے بے مثال ڈراموں میں بھی معین اختر کی اداکاری آج بھی انکے مداحوں کے ذہنوں میں تازہ ہیں۔

اسٹیج شوز ڈراموں میں بڈھا گھر پر ہے، یس سر عید نو سر عید، بے بیا معین اختر، بکرا قسطوں پر، آپ کے یادگار اسٹیج شوز ہیں۔

پاکستان یہ عظیم فنکار 22 اپریل2011  کو اپنے کروڑوں مداحوں کو سوگوار چھوڑ کر جہان فانی سے کوچ کرگیا مگر پھر بھی اپنے مداحوں کے دلوں میںزندہ ہے۔