بھارت میں معروف مسلم اداکارہ کے بھائی بے دردی سے قتل

بالی ووڈ کی معروف اداکارہ ہما قریشی کے خاندان پر اس وقت قیامت گزر گئی جب ان کے چچا زاد بھائی آصف قریشی کو دہلی کے نظام الدین علاقے میں چاقو کے وار کر کے قتل کر دیا گیا۔

یہ افسوسناک واقعہ پارکنگ کے معمولی تنازع پر پیش آیا۔ پولیس کے مطابق، آصف قریشی نے اپنے پڑوسیوں سے گھر کے سامنے سے اسکوٹر ہٹانے کے لیے کہا تھا، جس پر ملزمان نے اشتعال میں آ کر ان پر حملہ کر دیا۔

سی سی ٹی وی فوٹیج اور عینی شاہدین کے مطابق، ملزمان نے آصف کو سینے پر وار کر کے شدید زخمی کر دیا اور موقع سے فرار ہو گئے۔

آصف کو اسپتال پہنچایا گیا لیکن وہ زخموں کی تاب نہ لاتے ہوئے چل بسے۔ پولیس نے فوری کارروائی کرتے ہوئے دونوں ملزمان کو گرفتار کر لیا ہے۔

بتایا گیا ہے کہ مقتول اور ملزمان کے درمیان اس سے قبل بھی پارکنگ کے مسائل پر جھگڑے ہو چکے تھے۔