بھارتی ہٹ دھرمی، اسپاٹیفائی، اپیل میوزک، یوٹیوب سے پاکستانی گانے ڈیلیٹ

حالیہ کشیدگی اور تصادم کے بعد بھارتی حکومت کے احکامات پر تمام بڑے ڈیجیٹل پلیٹ فارمز سے پاکستانی گانے ہٹا دیے گئے ہیں۔

اسپاٹیفائی سے ہٹائے گئے گانوں میں "مانڈ"، "جھول"، اور "فاصلے"*

 بھی شامل ہیں۔ یہ اقدام دونوں پڑوسی ممالک کے درمیان جاری کشیدگی اور تنازعات کے وسیع تر اثرات کو ظاہر کرتا ہے۔  

انڈیا ٹوڈے کی رپورٹ کے مطابق، اسپاٹیفائی، ایپل میوزک اور یوٹیوب جیسے پلیٹ فارمز پر صارفین کو پاکستانی موسیقی تک رسائی نہیں مل پا رہی، جبکہ حکومت نے پاکستان سے تعلق رکھنے والے تمام مواد کو ہٹانے کا حکم جاری کیا تھا۔    

8 مئی کو بھارتی حکومت نے تمام او ٹی ٹی پلیٹ فارمز، اسٹریمنگ سروسز اور ڈیجیٹل کمپنیوں کو ہدایت جاری کی تھی کہ وہ پاکستان سے تعلق رکھنے والے تمام میڈیا مواد جیسے **ویب سیریز، فلمیں، گانے اور پوڈکاسٹ** وغیرہ کو فوری طور پر ہٹا دیں۔

 یہ قدم پہلگام کے معاملے پر دونوں ممالک کے درمیان فوجی کشیدگی بڑھنے کے بعد اٹھایا گیا۔ بھارت نے اس واقعے کے لیے پاکستان کو ذمہ دار ٹھہرایا، جبکہ پاکستان نے ان الزامات کو بے بنیاد قرار دیتے ہوئے آزادانہ تحقیقات کا مطالبہ کیا۔ تاہم، بھارت نے کسی بین الاقوامی تفتیش میں حصہ لینے سے انکار کر دیا۔  

اگرچہ فوجی تناؤ کچھ کم ہوا ہے، لیکن بھارت میں پاکستانی مواد کے بائیکاٹ کا سلسلہ جاری ہے۔ گزشتہ ہفتے جاری ہدایات میں بھارتی حکومت نے قومی سلامتی کو بنیادی وجہ بتاتے ہوئے کہا کہ ایسا مواد ملک کی خودمختاری، سالمیت اور عوامی امن کے لیے خطرہ ہو سکتا ہے۔ 

اس تنازعے سے متعلق ایک اور اہم پیش رفت یہ سامنے آئی کہ بالی وڈ فلموں میں کام کرنے والے پاکستانی اداکاروں کے پوسٹرز مختلف آن لائن پلیٹ فارمز سے ہٹا دیے گئے ہیں۔ حالیہ فوجی جھڑپوں کے بعد بھارت میں پاکستان مخالف جذبات میں شدت آئی ہے، جس کے تحت پاکستانی فنکاروں کے خلاف بھی اقدامات کیے جا رہے ہیں۔