اداکارہ کی موت، پولیس نے بہنوئی کو لاش دینے سے منع کردیا

کراچی: اداکارہ و ماڈل حمیرہ اصغر کی اپنے فلیٹ سے حال ہی میں برآمد ہونے والی نعش کے معاملے میں پولیس نے ان کے بہنوئی کو لاش کی تحویل دینے سے انکار کر دیا ہے۔ 

پولیس کے مطابق، قانونی تقاضوں اور تفتیش کے عمل کی تکمیل تک لاش کو تحویل میں نہیں دیا جا سکتا جبکہ لاش کی حوالگی کسی خونی رشتے والے کو ہی کی جائے گی۔

حمیرہ کی موت کے بارے میں تفتیش جاری ہے، اور پولیس نے تصدیق کی ہے کہ ڈیجیٹل فرانزک تجزیہ اور ابتدائی شواہد کے مطابق ان کی موت ممکنہ طور پر اکتوبر 2024 میں ہوئی۔

 حمیرہ کے بہنوئی نے لاش کی تحویل مانگی تھی تاکہ تدفین کا انتظام کیا جا سکے، لیکن پولیس نے واضح کیا کہ پوسٹ مارٹم رپورٹ اور دیگر قانونی کارروائیوں کے مکمل ہونے تک یہ ممکن نہیں۔

ایک نجی ٹی وی چینل کو دیے گئے انٹرویو میں حمیرہ کے اسٹائلسٹ دانش مقصود نے بتایا کہ ان کی آخری بات چیت اکتوبر 2024 میں واٹس ایپ پر ہوئی تھی، جہاں حمیرہ نے ایک فوٹو شوٹ کی تعریف کی اور خوشگوار موڈ میں تھیں۔ دانش نے بتایا کہ 20 اکتوبر کو بھیجا گیا ان کا پیغام غیر پڑھا رہا، اور حمیرہ کا واٹس ایپ "لاسٹ سین" 7 اکتوبر کو تھا۔ ان کی اچانک خاموشی پر تشویش کے باوجود معاملے کو ابتدا میں سنجیدگی سے نہیں لیا گیا۔

پولیس ذرائع کے مطابق، لاش کی حالت بتاتی ہے کہ موت کو کئی ماہ گزر چکے ہیں۔ تفتیش کے دوران تمام شواہد جمع کیے جا رہے ہیں تاکہ موت کے اسباب کا تعین کیا جا سکے۔ عوام اور حمیرہ کے مداحوں میں اس واقعے پر گہری تشویش پائی جاتی ہے، جبکہ پولیس نے یقین دہانی کرائی ہے کہ معاملے کی شفاف تحقیقات کی جائیں گی۔