پہلگام حملہ، مسلح افراد بے رحم اور انسان نہیں تھے، طلحہ انجم

معروف پاکستانی ریپر طلحہ انجم نے مقبوضہ جموں و کشمیر میں پہلگام حملے کے متاثرین کے لیے اظہار تعزیت کرتے ہوئے حملہ آوروں کو "بے رحم اور غیر انسانی" قرار دیا۔

طلحہ انجم نے ایکس (سابقہ ٹوئٹر) پر پہلگام کے قصبے میں نامعلوم مسلح حملہ آوروں کے ذریعے 27 سیاحوں کو دن دیہاڑے گولی مار کر ہلاک کرنے کے المناک واقعے پر اپنے دکھ کا اظہار کیا۔

انجم، جن کا ریپنگ اسٹائل انہیں بھارت میں بڑی مقبولیت دیتا ہے، نے حملے کے تقریباً ایک ہفتے بعد متاثرین اور ان کے اہل خانہ کے لیے ہمدردی کا اظہار کیا۔ دونوں ممالک کے درمیان بڑھتی دشمنی کے باوجود، انجم نے سرحدوں کے پار "امن اور ہم آہنگی" کو فروغ دینے کی ضرورت پر زور دیا۔  

پہلگام میں "فالس فلیگ آپریشن" کے بعد، بھارتی حکام نے نمایاں پاکستانی شخصیات کی ڈیجیٹل موجودگی کو محدود کر دیا ہے۔

 بھارتی میڈیا کے مطابق، ماہرہ خان، ہانیہ عامر، صنم سعید، سجل علی، علی ظفر اور عمران عباس سمیت کئی پاکستانی مشہور شخصیات کے سوشل میڈیا اکاؤنٹس بھارت میں بلاک کر دیے گئے ہیں۔

 اس کے علاوہ دیگر پاکستانی فنکاروں کے اکاؤنٹس بھی رسائی سے باہر ہو گئے ہیں۔  

یہ ڈیجیٹل سنسرشپ پاکستانی میڈیا مواد پر وسیع تر پابندیوں کے ساتھ آئی ہے۔ اس سے قبل، بھارت نے جسے خود کو دنیا کا سب سے بڑا جمہوری ملک اور آزادی اظہار کا محافظ قرار دیتا ہے، کم از کم 16 پاکستانی یوٹیوب چینلز پر پابندی لگا دی تھی۔ 

ان میں جیو نیوز، ڈان نیوز، سما ٹی وی، اے آر وائی نیوز اور بول نیوز جیسے بڑے نیوز چینلز شامل ہیں۔  

مشہور پاکستانی صحافیوں کے چلائے جانے والے یوٹیوب چینلز بھی بلاک کیے گئے ہیں۔ اس کے علاوہ کھیل اور حالات حاضرہ کو کور کرنے والے پلیٹ فارمز بھی فہرست میں شامل ہیں۔  

بھارتی حکام نے پہلگام واقعے کی تنقیدی کوریج کے بعد ان چینلز پر "گمراہ کن" اور "اشتعال انگیز" مواد پھیلانے کا الزام لگایا ہے۔ تاہم، کوئی ٹھوس ثبوت یا غلط معلومات کی مخصوص مثالیں فراہم نہیں کی گئی ہیں۔