پولیو کے کیسز کی تعداد 33 تک پہنچ گئی

حکام نے منگل کے روز تصدیق کی ہے کہ بلوچستان کے شہر کوئٹہ سے ایک بچے کو پولیو وائرس کی تشخیص ہوئی ہے جس کے بعد رواں سال پاکستان میں پولیو کیسز کی مجموعی تعداد 33 ہوگئی۔

 نیشنل انسٹی ٹیوٹ آف ہیلتھ (این آئی ایچ) نے تصدیق کی کہ صوبائی دارالحکومت میں اس سال تیسرا کیس رپورٹ ہوا۔

 مزید برآں، شہر میں سیوریج کے 37 نمونے وائرس کی موجودگی کے لیے مثبت پائے گئے۔

 بلوچستان 17 کیسز کے ساتھ انتہائی متاثر ہے، 2024 میں سندھ میں 10 کیسز ریکارڈ کیے گئے، اس کے بعد خیبر پختونخوا میں 4 کیسز اور اسلام آباد اور پنجاب میں ایک ایک کیس سامنے آیا۔

 ملک گیر انسداد پولیو ویکسین مہم کے باوجود کیسز تیزی سے بڑھ رہے تھے۔ تاہم، ایک اور مہم 28 اکتوبر سے شروع ہوگی۔ 

 5 ستمبر کو این آئی ایچ نے پولیو کیسز کے تفصیلی اعدادوشمار قومی اسمبلی کے سامنے پیش کیے تھے۔

 سرکاری دستاویزات کے مطابق، NIH نے گزشتہ چار سالوں میں مجموعی طور پر پاکستان بھر میں پولیو کے 45 کیسز رپورٹ کیے ہیں۔ 2021 میں صرف ایک کیس رپورٹ ہوا تھا، لیکن 2022 میں یہ تعداد بڑھ کر 20 ہو گئی۔

 مزید یہ کہ 2023 میں چھ نئے کیسز ریکارڈ کیے گئے جبکہ 2024 میں کیسز کی تعداد 33 تک پہنچ گئی۔

 2022 میں حکومت نے پولیو کے خاتمے کے لیے 180 ملین ڈالر مختص کیے تھے، جسے 2023 میں بڑھا کر 187 ملین ڈالر کر دیا گیا۔ سال 2024 کے لیے بجٹ صرف 80 ملین ڈالر رہ گیا۔