ڈکی بھائی کے سوشل میڈیا اکاؤنٹس، اے ٹی ایمز کی واپسی میں پیشرفت

معروف یوٹیوبر سعدالرحمان المعروف ڈکی بھائی کے سوشل میڈیا اکاؤنٹس اور اے ٹی ایم کارڈز کی سپرداری سے متعلق درخواست پر عدالت میں اہم پیشرفت ہوئی ہے۔

تفصیلات کے مطابق لاہور کی ضلع کچہری میں جوڈیشل مجسٹریٹ نعیم وٹو نے کیس کی سماعت کی۔

سماعت کے دوران این سی سی آئی اے کے وکیل نے مؤقف اختیار کیا کہ تفتیشی افسر اس وقت اسلام آباد میں موجود ہیں اور شعیب ریاض نے ابھی تک کیس کا ریکارڈ واپس نہیں بھیجا۔

عدالت نے ڈکی بھائی کے وکیل سے استفسار کیا کہ ان کے مؤکل یوٹیوب کس طرح استعمال کر رہے تھے؟ جس پر وکیل نے وضاحت دیتے ہوئے بتایا کہ اصل یوٹیوب اکاؤنٹ این سی سی آئی اے کے قبضے میں ہے جبکہ زیرِ بحث اکاؤنٹ صرف ایڈیٹر کے استعمال کے لیے تھا۔

وکیلِ صفائی کا کہنا تھا کہ یہ سپرداری کی درخواست ہے اور ان کا مطالبہ ہے کہ این سی سی آئی اے کے پاس موجود الیکٹرانک ڈیوائسز، موبائل فونز، چار کریڈٹ کارڈز اور متعلقہ رقم ان کے مؤکل کے حوالے کی جائے۔

دوسری جانب این سی سی آئی اے نے ایک مرتبہ پھر رپورٹ جمع کرانے کے لیے مزید وقت مانگا۔ عدالت نے این سی سی آئی اے کو 15 دسمبر تک رپورٹ جمع کروانے کا حکم دیتے ہوئے سماعت ملتوی کردی۔