سامعہ حجاب کیس کا ڈراپ سین، ٹک ٹاکر نے حسن زاہد کو معاف کردیا

ٹک ٹاکر سامعہ حجاب اور ان کے سابق منگیتر حسن زاہد کے تنازعے کا اختتام خوش اسلوبی سے ہو گیا، سامعہ حجاب نے حسن زاہد کو معاف کردیا۔

دونوں فریقین کے درمیان باہمی رضامندی سے صلح طے پا گئی ہے اور انہوں نے ایک دوسرے کو بنا کسی شرط کے معاف کر دیا ہے۔

ذرائع کا کہنا ہے کہ سامعہ حجاب نے حسن زاہد کے خلاف لگائے گئے تمام الزامات واپس لے لیے ہیں، جبکہ حسن زاہد نے بھی اپنی کوتاہیوں کا اعتراف کرتے ہوئے سامعہ سے معافی مانگ لی اور انہیں ہر ممکن اطمینان دلایا۔

یاد رہے کہ سامعہ حجاب نے الزام عائد کیا تھا کہ حسن زاہد نے انہیں ان کے گھر کے باہر سے اغواء کرنے کی کوشش کی اور جان سے مارنے کی دھمکیاں بھی دیں۔ اسی بنیاد پر تھانہ شالیمار میں مقدمہ درج کیا گیا اور حسن زاہد کو عدالتی حکم پر جیل بھی بھیجا گیا تھا۔

بعد ازاں دونوں کی مشترکہ تصاویر اور ویڈیوز سوشل میڈیا پر وائرل ہوئیں تو عوام نے شدید ردعمل دیا، جس پر سامعہ نے وضاحت کی کہ حسن زاہد ان کا منگیتر تھا۔

اب صلح کے بعد یہ کیس باضابطہ طور پر ختم کر دیا گیا ہے اور دونوں نے اس تنازعے کو ماضی کا حصہ بنانے پر اتفاق کر لیا ہے۔