بنوں میں دہشت گردوں کا چیک پوسٹ پر ڈرون سے حملہ، 6 ایف سی جوان زخمی

خیبرپختونخوا کے ضلع بنوں کے علاقے تختی خیل میں دہشت گردوں نے ایف سی کی چیک پوسٹ پر ڈرون کے ذریعے حملہ کیا ہے۔

تفصیلات کے مطابق بنوں کے تختی خیل میں ایف سی چیک پوسٹ پر دہشت گردوں کی جانب سے کواڈ کاپٹر ڈرون حملہ کیا گیا جس میں چیک پوسٹ پر تعینات 6 ایف سی اہلکار دوران ڈیوٹی زخمی ہوگئے۔ 

حملے کے بعد سیکیورٹی فورسز کی بھاری نفری اور ریسکیو ٹیمیں جائے وقوعہ پہنچیں جہاں سے زخمیوں کو سی ایم ایچ بنوں منتقل کیا گیا۔

پولیس کے مطابق ایف سی کی جانب سے کواڈ کاپٹر ڈرون پر فائرنگ کی گئی ہے جس پر دہشت گردوں نے ڈرون واپس بھگایا اور لے گئے۔

سیکیورٹی ذرائع کا کہنا ہے کہ دہشت گردوں کی جانب سے کواڈ کاپٹر ڈرون حملوں میں مسلسل اضافہ ہوتا جارہا ہے، کواڈ کاپٹر ڈرون حملوں سے شہری ذہنی اذیت میں مبتلا ہے۔