عمران خان کا خط مل گیا، سنگین مسائل کی نشاندہی اور ثبوت بھی دیے ہیں، چیف جسٹس

چیف جسٹس آف پاکستان جسٹس یحییٰ آفریدی نے آئی ایم ایف حکام سے ملاقات کے بعد صحافیوں سے گفتگو میں کہا ہے کہ بانی پی ٹی آئی کی جانب سے بھیجا گیا خط ججز کی آئینی کمیٹی کو بھیج دیا ہے۔

عالمی مالیاتی ادارے (آئی ایم ایف) کے خصوصی وفد سے سپریم کورٹ میں ملاقات کے بعد چیف جسٹس یحییٰ آفریدی نے عمران خان کا خط موصول ہونے کی تصدیق کی۔

یحیحیٰ آفریدی نے کہا کہ عمران خان کا خط ججز کی آئینی کمیٹی کو بھیج دیا ہے کیونکہ اس حوالے سے فیصلہ ان کو ہی کرنا ہے اور وہ ہی طے کریں گے، آئینی بینچ اس خط کا جائزہ لے کر معاملہ کچھ فیصلہ کرے گا۔

انہوں نے کہا کہ سابق وزیراعظم عمران خان کا خط پڑھا جس میں سنجیدہ مسائل کی نشاندہی کے ساتھ ثبوت بھی دیئے گئے، عمران خان کی اچھی بات یہ ہے کہ خط میں انہوں نے محض الزام نہیں لگائے بلکہ شواہد اور یو ایس بی بھی دی۔

چیف جسٹس پاکستان نے کہا کہ میں نے آئی ایم ایف وفد کو جواب دیا کہ ہم نے آئین کے تحت عدلیہ کی آزادی کا حلف اٹھا رکھا ہے، ہمارا کام نہیں ہے آپکو ساری تفصیل بتائیں، میں نے وفد کو نیشنل جوڈیشل پالیسی میکنگ کمیٹی کے ایجنڈے کا بتایا۔

انہوں نے کہا کہ میں نے وفد کو بتایا ماتحت عدلیہ کی نگرانی ہائیکورٹس کرتی ہیں، وفد نے کہا معاہدوں کی پاسداری، اور پراپرٹی حقوق کے بارے میں ہم جاننا چاہتے ہیں، میں نے جواب دیا اس پر اصلاحات کر رہے ہیں۔

چیف جسٹس پاکستان نے کہا کہ میں نے وفد کو بتایا ہم تجویز دیں گے، ہائیکورٹس میں جلد سماعت کیلئے بنچز وہ بنائیں گے، میں نے وفد سے کہا جو آپ کہہ رہے ہیں وہ دو طرفہ ہونا چاہیے، وفد نے کہا ہم پاکستان میں غیر ملکی سرمایہ کاری کا تحفظ چاہتے ہیں، میں نے وفد سے کہا ہمیں عدلیہ کیلئے آرٹیفشل انٹیلی جنس چاہیے ہوگی۔