چینی بحران پر حکومت کا بڑا ایکشن، لاکھوں ٹن شوگر قبضے میں لے لی، مالکان کے گرد گھیرا تنگ

وفاقی حکومت نے چینی بحران پر قابو پانے کے لیے بڑا اقدام اٹھاتے ہوئے ملک بھر کی تمام شوگر ملز کا ذخیرہ اپنے کنٹرول میں لے لیا ہے۔

یہ فیصلہ چینی کی مصنوعی قلت اور قیمتوں میں مزید اضافے کے خدشے کے پیش نظر کیا گیا ہے۔ وزارتِ نیشنل فوڈ سیکیورٹی کے حکام کے مطابق، تقریباً 19 لاکھ میٹرک ٹن چینی اب حکومت کی نگرانی میں آ گئی ہے۔

اس اقدام کے تحت، تمام شوگر ملز کے گوداموں میں چینی کی سپلائی اور اسٹاک کی نگرانی کے لیے فیڈرل بورڈ آف ریونیو (ایف بی آر) کے اہلکار تعینات کر دیے گئے ہیں۔

اس کے علاوہ، چینی کے اسٹاک پر ٹریک اینڈ ٹریس سسٹم بھی لگا دیا گیا ہے تاکہ اس کی نقل و حرکت پر مکمل نظر رکھی جا سکے۔

حکام نے مزید بتایا کہ 18 شوگر ملز کے مالکان اور دیگر افراد کے نام ایگزٹ کنٹرول لسٹ (ای سی ایل) میں بھی ڈال دیے گئے ہیں تاکہ وہ ملک سے باہر نہ جا سکیں۔

ان افراد کے نام جلد ہی جاری کیے جائیں گے۔ یاد رہے کہ اس سے قبل گھی کی پیداوار اور سپلائی کی نگرانی کے لیے بھی گھی ملز میں ایف بی آر کے اہلکار تعینات کیے جا چکے ہیں۔