ڈیفنس واقعہ سوشل میڈیا کی وجہ سے اٹھا ورنہ ہمارا سسٹم بے بس ہے، خواجہ آصف

وفاقی وزیر دفاع خواجہ آصف نے ڈیفنس میں معمولی حادثے کے بعد شہری پر بااثر شخص کے تشدد کے واقعے کو افسوسناک قرار دیا ہے۔

انہوں نے کہا کہ ایسے افسوسناک واقعات میں ریاست عوامی غم و غصے پر ایکشن لیتی ہے اور حقیقت ہے کہ سسٹم ان لوگوں کے آگے بے بس ہے۔ انہوں نے کہا کہ ہماری مالدار اشرافیہ مدعی کو مجبور کرلیتی ہے کیونکہ اُن کا دفاع مایہ ناز وکیل کررہے ہوتے ہیں۔

انہوں نے سوال کیا کہ کیا موٹرسائیکل سوار اور اُس کی بہن دباؤ کو برداشت کرسکیں گے کیونکہ بڑے بڑے قتل کے مشہور ملزم اپنے اثر و رسوخ کی بدولت آج آزاد ہیں، اس پر ہمارے سسٹم کی بے بسی پر صرف ماتم کیا جاسکتا ہے۔

خواجہ آصف نے کہا کہ سوشل میڈیا کے عوامی ردعمل کی وجہ سے یہ شخص (سلمان فاروقی) قید ہے، جس دن یہ دباؤ کم ہوگیا تو مک مکا ہوجائے گا اور ہمارا سسٹم سرینڈر کردے گا جبکہ میں خود بھی اس سسٹم ک ہی حصہ ہوں۔

انہوں نے عوام کو سوشل میڈیا پر اپنے مسائل اجاگر کرنے اور اسی طرح ظلم کے خلاف آواز بلند کرنے کا مشورہ دیتے ہوئے کہا کہ عوام اپنے حقوق پر پہرا دیں اور ہم جیسے لوگوں، سسٹم کو اپنی موجودگی کا احساس دلاتے رہیں۔