دھمکیاں دینے والوں کو خاموش کرائیں گے، فضل الرحمان

جمعیت علما اسلام کے سربراہ مولانا فضل الرحمان نے ڈی جی آئی ایس پی آر کا نام لیے بغیر کہا ہے کہ دھمکیاں دے کر ہمیں خاموش کرانے کی کوشش نہ کرو کیونکہ ہم دھمکیاں دینے والوں کو خاموش کرائیں گے۔

پشاور میں منعقدہ عوامی اسمبلی کے نام سے منعقدہ جلسے سے خطاب کرتے ہوئے کہا کہ ہم چاروں صوبائی اور قومی اسمبلی کو مسترد کرتے ہیں اور اب اس کے خلاف جدوجہد کریں گے۔

انہوں نے کہا کہ فوج سیاسی کردار ختم کر کے واپس چلے جائے تو اُس کو کچھ نہیں کہوں گا، دعویٰ کیا جاتا ہے کہ سیاست میں مداخلت نہیں مگر میں اپنے دعوے پر قائم ہوں کہ مداخلت کی جارہی ہے۔

فضل الرحمان کا کہنا تھا کہ ہم بلاوجہ کسی سے لڑائی یا اُس کی مخالفت نہیں کرتے، میں آرمی چیف اور ڈی جی آئی ایس آئی کو اچھی طرح سے جانتا ہوں، آج اگر آپ (فوج) سیاست میں مداخلت کو ختم کر دے تو میں آپ کو کچھ نہیں کہوں گا۔

انہوں نے کہا کہ آئین میں یہ بھی گنجائش نہیں کہ فوج سیاست پر بات کرے کیونکہ ایک فوجی سیاست میں مداخلت نہ کرنے کا حلف اٹھاتا ہے، ان باتوں اور حقائق کے بعد ہم پر رعب ڈالنے کی کوشش نہ کی جائے کیونکہ اب ہم نے عوام کے ساتھ میدان میں آنے کا فیصلہ کرلیا ہے، جس کے لیے جیل تک جانے کے لیے تیار ہیں۔

فضل الرحمان نے انکشاف کیا کہ ہمیں اس جہدوجہد سے پیچھے ہٹںے کے لیے پیش کش کی گئی ہے مگر ہم نے انکار کیا کیونکہ اب مینڈیٹ عوام کے پاس ہے اور وہی فیصلہ کریں گے، عوام بھیڑ بکریاں ہیں جو اُن کی مرضی پر کوئی اور آکر مسلط ہوجائے۔