جمشید دستی اور اقبال خان کی رکنیت بحال، اسمبلی میں داخلے کی پابندی بھی ختم

اسپیکر قومی اسمبلی نے تحریک کثرت رائے سے منظور ہونے کے بعد پی ٹی آئی کے اراکین اسمبلی جمشید دستی اور اقبال خان کی رکنیت بحال کردی۔

تفصیلات کے مطابق ایاز صادق کی زیر صدارت اجلاس میں وزیر قانون اعظم نزیر تارڑ نے تحریک ایوان میں پیش کی جس کے منظور ہونے کے بعد اسپیکر نے جمشید دستی اور اقبال خان کی ایوان میں داخلے پر پابندی کے احکامات واپس لے لیے۔

جمشید دستی اور اقبال خان کو ایوان میں حاضری کی اجازت مل گئی۔ اسپیکر قومی اسمبلی نے جمشید دستی اور اقبال افریدی کی موجودہ اجلاس میں حاضری سے متعلق معطلی ختم کر دی۔

اسپیکر قومی اسمبلی ایاز صادق نے دونوں اراکین کو بحال کر دیا۔ واضح رہے کہ جمعے کو ہونے والے پارلیمنٹ کے مشترکہ اجلاس میں صدر مملکت آصف زرداری کی تقریر کے دوران دونوں اراکین پر بدتمیزی کرنے اور آوازیں کسنے کا الزام تھا جس پر اسپیکر نے دونوں کی رکنیت معطل کردی تھی۔