کمبوڈیا میں زیر حراست پاکستانیوں کی حالت زار پر حکومت نے نوٹس لے لیا

اسلام آباد میں دفتر خارجہ کے ترجمان نے کمبوڈیا میں زیرِ حراست پاکستانی شہریوں سے متعلق وضاحت جاری کرتے ہوئے بتایا ہے کہ معاملہ سفارتی سطح پر اٹھا لیا گیا ہے اور جلد پیش رفت متوقع ہے۔

ترجمان کے مطابق کمبوڈیا میں تعینات پاکستانی سفارت خانے نے مقامی حکام سے رابطہ کیا ہے، جبکہ نائب وزیراعظم کی ہدایت کے تحت دنیا بھر میں پاکستانی مشنز کو بیرونِ ملک مقیم شہریوں کو سہولت فراہم کرنے کی ہدایت دی گئی ہے۔

دفتر خارجہ کا کہنا ہے کہ کمبوڈیا کے حکام نے صوبہ سیم ریپ میں زیرِ حراست 54 پاکستانی شہریوں کو جلد وطن واپس بھیجنے پر آمادگی ظاہر کی ہے۔ یہ افراد ایک مبینہ آن لائن دھوکہ دہی کے مرکز پر چھاپے کے دوران گرفتار کیے گئے تھے۔

ترجمان نے بتایا کہ سفارت خانے کا عملہ زیرِ حراست افراد کی فلاح و بہبود کو یقینی بنانے کے لیے متحرک ہے اور جیسے ہی پرواز کے انتظامات مکمل ہوں گے، انہیں پاکستان واپس بھجوا دیا جائے گا۔

مزید کہا گیا کہ کمبوڈیا کی جانب سے یہ اقدام خیرسگالی کے طور پر کیا جا رہا ہے، جس کے تحت ان افراد کو "آن لائن فراڈ کے خلاف قانون" کے تحت قانونی کارروائی کے بغیر ملک بدر کیا جائے گا۔