کرم میں پھر متحارب گروپوں کی جھڑپیں، حملے میں ملوث دو ملزمان گرفتار

خیبرپختونخوا کے ضلع کرم کے علاقے بوشہرہ میں گزشتہ روز ہونے والے فائرنگ کے واقعے کی تین ایف آئی ار درج کر کے دو افراد کو گرفتار کر لیا گیا جبکہ مزید افراد کی گرفتاری کا سلسلہ جاری ہے، زخمی پولیس اہلکار شہید ہوگیا۔

پولیس ذرائع کے مطابق گزشتہ روز بوشہرہ میں صبح فائرنگ کے واقعے میں دو افراد زخمی ہو گئے تھے جس کے بعد فریقین کے مابین فائرنگ کا سلسلہ شروع ہوا۔

 ضلعی انتظامیہ اور پولیس فائربندی اور قیام امن کے لیے علاقے میں پہنچی تو اس پر حملہ کیا گیا جس میں اسسٹنٹ کمشنر سعید منان زخمی ہو گئے جبکہ تیسرا واقعہ شام کے قریب پیش آیا جس میں سپاہی سید عاشق حسین شہید ہو گئے۔

 پولیس نے تینوں واقعات کے الگ الگ ایف آئی آر درج کر لیے ہیں اور اب تک دو افراد گرفتار کر لیے گئے ہیں جبکہ مزید افراد کی گرفتاری کا سلسلہ جاری ہے پولیس کے مطابق بوشہرہ قبائل کے شناختی کارڈ ڈومیسائل اور پاسپورٹ بنانے سمیت تمام سرکاری مراعات بھی تا حکم ثانی بند کر دیے ہیں۔

اس کے علاوہ پرتشدد واقعات میں ایک ٹیچر جاں بحق ہوگیا جبکہ متعدد علاقوں میں مسلح افراد نے حملے کیے جس کے باعث کشیدگی دوبارہ پھیل گئی ہے۔