خوارج پر زمین تنگ، فورسز کی کارروائی میں 22 ہلاک

ضلع خیبر میں سکیورٹی فورسز اور قانون نافذ کرنے والے اداروں نے خفیہ معلومات کی بنیاد پر کارروائی کرتے ہوئے 22 دہشتگردوں کو ہلاک کردیا۔

پاک فوج کے شعبہ تعلقاتِ عامہ کے مطابق یہ آپریشن 21 اپریل کو کیا گیا، جس کے دوران فورسز اور دہشتگردوں کے درمیان شدید فائرنگ کا تبادلہ ہوا۔ کارروائی کے نتیجے میں 22 دہشتگرد مارے گئے۔

آئی ایس پی آر کا کہنا ہے کہ دہشتگردوں نے گرفتاری سے بچنے کے لیے اندھا دھند فائرنگ کی، جس کے باعث ایک 10 سالہ بچہ جاں بحق ہوگیا۔

بیان میں مزید بتایا گیا کہ مارے جانے والے دہشتگرد مختلف تخریبی کارروائیوں میں ملوث تھے، جبکہ ان کے قبضے سے بھاری مقدار میں اسلحہ اور گولہ بارود بھی برآمد کیا گیا ہے۔

فوج کے مطابق علاقے میں مزید دہشتگردوں کی موجودگی کے پیش نظر سرچ اور کلیئرنس آپریشن بدستور جاری ہے۔