لوڈشیڈنگ پر احتجاج کے دوران ہنگامہ آرائی پر متعدد مظاہرین کو پولیس نے گرفتار کرلیا

شہر قائد کے علاقے ایف سی ایریا میں لوڈشیڈنگ کے خلاف کے الیکٹرک کے دفتر کے باہر احتجاج کرنے والے متعدد مظاہرین کو پولیس نے حراست میں لے لیا۔

تفصیلات کے مطابق شہر قائد کے علاقے ایف سی ایریا اور لیاقت آباد کے مکینوں نے طویل غیر اعلانیہ لوڈ شیڈنگ کے خلاف کے الیکٹرک کے دفتر کے باہر احتجاج کیا۔

اس دوران مشتعل مظاہرین نے کے الیکٹرک کی دو گاڑیوں پر پتھراؤ کیا جس کے نتیجے میں شیشے بھی ٹوٹے جبکہ دروازے پر بھی مشتعل افراد نے پتھر مارے۔

کے الیکٹرک حکام نے مظاہرے کو حملے کا نام دے کر شریف آباد تھانے میں مقدمہ درج کرایا اور سی سی ٹی وی فوٹیج فراہم کی جس کے بعد پولیس نے ہنگامہ آرائی، بلوے اور دیگر دفعات کے تحت مقدمہ درج کر کے متعدد مظاہرین کو حراست میں لے لیا۔

ایس ایس پی سینٹرل ذیشان صدیقی نے مظاہرین کو گرفتار کرنے کی تصدیق کرتے ہوئے کہا کہ ویڈیو میں نظر آنے والے دیگر افراد کی گرفتاری کیلیے بھی مختلف مقامات پر چھاپے مارے گئے ہیں۔

اُدھر گرفتاریوں کے خلاف ایف سی ایریا کے مکینوں کا شریف آباد تھانے کے باہر مظاہرہ کیا اور گرفتار نوجوانوں کی رہائی کا مطالبہ بھی کیا، اس موقع پر پولیس کی بھاری نفری کو طلب کیا گیا۔