امریکا، ایران مذاکرات، پاکستان کی ثالث بننے کی پیشکش

پاکستان نے امریکا اور ایران کے درمیان جاری کشیدگی کے حل کے لیے مذاکرات کی میزبانی کی پیشکش کر دی ہے۔

میڈیا رپورٹس کے مطابق دفتر خارجہ کے ترجمان کا کہنا ہے کہ اگر دونوں ممالک آمادہ ہوں تو اسلام آباد بات چیت کے انعقاد کے لیے تیار ہے۔ ان کا کہنا تھا کہ پاکستان خطے میں امن اور استحکام کے فروغ کے لیے ہمیشہ سفارتی کوششوں کی حمایت کرتا رہا ہے اور اسی جذبے کے تحت یہ پیشکش کی گئی ہے۔

ترجمان نے مزید کہا کہ پاکستان ایسے کسی بھی اقدام میں سہولت کاری کے لیے تیار ہے جو تنازع کے پرامن حل میں مدد دے سکے۔

یہ پیشکش ایسے وقت سامنے آئی ہے جب امریکا کی جانب سے ممکنہ فوجی کارروائی کو عارضی طور پر چند دنوں کے لیے مؤخر کیا گیا ہے تاکہ سفارتی راستہ اختیار کیا جا سکے۔